(開箱) Kyosho京商Mini-Z MR-04 EVO2配置公開和上一代MR03零件兼容程度? 遙控速度大升級 ! 有感無刷馬達更順? 對應三和遙控系統罕見90mm軸距車殼GR Yaris同期推出

前言

今次要講就係Kyosho最新Mini-Z車架MR-04，咁啱喺我想再玩返mini z嘅時候佢就推出咗啦！

通常MiniZ都係分跟車殼同遙控既普通版，同埋進階嘅EVO版跟無刷電變加摩打同少量Option零件走珠差速以及全車走珠啤令

今次MR-04剛推出嘅版本就係EVO2版本，對比以前MR03 EVO版本，今代係全新既無刷動力系統加入感應器去讀取摩打磁位，令摩打效率更高，對比上代加速更順暢, 低轉速更跟手！呢個版本係無包含接收器，因為佢係可以更換對應唔同遙控牌子嘅接收器，需要另外選擇！

Option件方面，EVO2版本也一如傳統車尾跟走珠差速以及全車走珠啤令，以往嘅EVO版本車架膠料都會用硬料而今次MR04用嘅膠料係咪硬料呢？暫時就唔敢肯定，因為到呢一刻佢嘅Option零件都係仲未有賣街嘅，所以唔確定是MR04包含的是硬料或軟料

以上講緊嘅Oprion件喺普通版MINI-Z都係冇嘅，大概可以咁樣理解EVO版本嘅分別！

而今代其中一項重點就係Radio遙控系統速度，MR-04最新嘅接收機官方理論數據用KO ADV mode 速度係0.99ms , 用Futaba EVO2 mode 速度係0.9ms，而以往舊車嘅接收機就係2.6 ms~ 3.0ms左右，呢個數值代表啲咩呢?

我用我自己方法解釋ms就係時間嘅單位，0.9ms即係代表Mini-Z接收同遙控每0.0009秒就會溝通一次，而舊款接收就係0.003秒先會同遙控溝通一次，代表新款接收每秒同遙控溝通嘅次數更多所以反應更跟手！

但係呢個速度升級暫時只係對應Futuba同埋KO接收機，而我本身係用緊三和系統(Sanwa M17)遙控器，暫時未有計劃另外開多一支新遙控專玩Mini-Z，所以只能夠用代用嘅Sanwa制式接收機，速度方面搵唔到有數據，希望都可以達到舊車嘅3.0ms左右啦

而代用三和接收機，聽到有車友有用緊係可以對應用得到MR04，不過喺插頭嗰方面就同Kyosho電路版有輕微插唔實情況，需要花啲心思固定(筆者暫時用熱熔膠固定)，唔知係咪個別情況呢？不過我會試咗先，暫時唔會換遙控住，希望大車細車都用三和系統！

雖然三和可能比起最新嘅KO同Futaba系統係相對慢但佢哋都係一啲高級同高速嘅遙控系統，對比起MR03或者將來MR04跟車嘅套裝遙控係兩個級數，應唔應該升級遙控在於你想點玩，如果你係啱啱入門嘅我建議你用原裝遙控玩住先，暫時唔需要在花錢去升級遙控！

但如果你已經係一個有經驗嘅駕駛者，正所謂無比較無傷害，當你用原裝跟車遙控拍埋高速遙控同場比較，你會發覺當你想跟到其他高速遙控玩家既步速，就會發覺你的原裝跟車遙控MiniZ操控比較遲鈍控制有啲困難，感覺大概係咁樣，所以如果認真玩值得投資一支高級遙控．

新款動力系統係有感無刷，有感應器無刷可以讀取摩打磁芯位置，相對無感無刷更加線性效率更高而且摩打由靜止到起步最低轉速可以更慢，加減速也更線性，但MR04隻新電變係咪真係有明顯分別呢我哋比較下

而理論上有感無刷系統係可以有Turbo功能，呢個暫時冇資料可能要等Mini Z嘅ICS軟件出嚟，我哋先知可唔可以調教到呢個功能喇，特別要注意因為ICS軟件仲未上架，所以原裝車後波比較遲鈍，呢個暫時就調教唔到。

簡單理解，基本上車頭嘅所有零件都用唔返，包括轉向杯, 頂冚, 底冚, 搖臂, 彈弓都用唔返，車尾嘅摩打座同T版查查中避震都用得返，但要留意唔係全部查查版都可以固定到係MR-04嘅螺絲孔位上面, 未必所有查查都用到。

分享嚟到呢一度，MR-04呢一刻只係有EVO2版本，跟返傳統之後應該會有跟車殼同遙控嘅套裝車版本，但暫時未有消息 ! 而另外一樣值得留意嘅就係最近新出嘅GR Yaris，佢係一部90mm軸距車殼，相信又會興起一大班人玩90mm窄陣軸距操控大鬥法！